ఆపదలో ఉన్న పూర్వ విద్యార్థులను ఆదుకోవడమే స్వాన్ లక్ష్యం

స్వేచ్ఛ న్యూస్, నార్కెట్పల్లి, జనవరి 7: ఆపదలో ఉన్న పూర్వ విద్యార్థులను ఆర్థికంగా, కెరియర్ పరంగా ఆదుకోవడమే లక్ష్యంగా స్వాన్ (స్టూడెంట్ వెల్ఫేర్ అసోసియేషన్ ఆఫ్ నార్కెట్పల్లి) ఏర్పాటు చేసినట్లు వ్యవస్థాపకుడు మామిళ్ల సత్తిరెడ్డి పేర్కొన్నారు. ఆదివారం నార్కెట్పల్లి మండల కేంద్రంలోని శబరి గార్డెన్ ఫంక్షన్ హాల్ లో నిర్వహించిన స్వాన్ సమావేశానికి ముఖ్యఅతిథిగా హాజరైన ఆయన మాట్లాడుతూ జిల్లా పరిషత్ ఉన్నత పాఠశాల నార్కెట్ పల్లి లో చదువుకున్న పూర్వ విద్యార్థుల అందరిని కలిపి ఒక సంస్థను ఏర్పాటు చేసి వారి సంక్షేమం కోసం ఆర్థిక సహాయాలు, కెరియర్ గైడెన్స్, వారి పిల్లల ఉన్నత చదువులు తదితర కార్యక్రమాలు చేపట్టనున్నట్లు తెలిపారు. ఈ కార్యక్రమంలో భాగంగా ఈరోజు ఉదయం 9:30 గంటలకు స్థానిక జడ్పీహెచ్ఎస్ లో పూర్వ విద్యార్థులందరూ కలిసి తమ చిన్ననాటి జ్ఞాపకాలను నెమరు వేసుకుంటూ వందేమాతరం పాడి ప్రతిజ్ఞ చేశారు. అనంతరం పాఠశాల ఆవరణలో చెట్లను నాటి అక్కడి నుంచి కార్యక్రమం నిర్వహించే శబరి గార్డెన్ వరకు ర్యాలీగా వెళ్లారు. జ్యోతి ప్రజ్వలనతో కార్యక్రమాన్ని ప్రారంభించిన అనంతరం పూర్వ విద్యార్థులలో దురదృష్టవశాత్తు తమకు దూరమైన మిత్రులకు శ్రద్ధాంజలి ఘటించి వారి జ్ఞాపకాలను నెమరు వేసుకున్నారు. అనంతరం వచ్చిన విద్యార్థిని విద్యార్థులకు స్వాన్ ఏర్పాటు ఉద్దేశం భవిష్యత్తు కార్యచరణ పై ప్రసంగించారు. స్వాన్ లక్ష్యం ఉన్నతంగా ఉందని మనకోసం మనం అనే నినాదంతో ఏర్పాటు చేసుకున్న ఈ సంస్థ ఇదే లక్ష్యంతో భవిష్యత్తు కార్యాచరణ రూపొందించుకొని క్రమశిక్షణతో నడవాలని వందేమాతరం ఫౌండేషన్ వ్యవస్థాపకులు రవీందర్, జలసాధన సమితి నాయకులు దుశ్చర్ల సత్యనారాయణ, ఉపాధ్యాయిని ఉపాధ్యాయులు వనజాత, పృద్విరాణి, సుజాత, లక్ష్మి, ఉదయశ్రీ, హైమావతి, శ్రీరాములు, యాదగిరి రెడ్డి లు అభిప్రాయపడ్డారు. ఇంత పెద్ద ఎత్తున కార్యక్రమాన్ని నిర్వహించిన నిర్వాహకులను అభినందించారు. అనంతరం కోవిడ్ సమయంలో జడ్పీహెచ్ఎస్ హెడ్మాస్టర్ గా పదవీ విరమణ పొందిన పృథ్వి రాణి ఉపాధ్యాయురాలికి శాలువాతో ఘనంగా సత్కరించారు. ముఖ్య అతిధులచే స్వాన్ తరఫున ముద్రించిన 2024వ సంవత్సర క్యాలెండర్ ను ఆవిష్కరించారు. అదేవిధంగా 2003 బ్యాచ్ కి సంబంధించిన ఓర్సు విష్ణు దంపతులు ప్రమాదవశాత్తు మృతి చెందడంతో వారి పిల్లలకు 2 లక్షల రూపాయలు ఆర్థిక సహాయం అందజేశారు. అనారోగ్యంతో మృతి చెందిన 2010 బ్యాచ్ కి చెందిన ఆదిమల్ల లోకేష్ చెల్లెలు శివానికి 50 వేల రూపాయల ఆర్థిక సహాయం అందజేశారు. ఈ కార్యక్రమంలో 1995- 96 బ్యాచ్ నుంచి 2018 బ్యాచ్ వరకు పలువురు విద్యార్థిని విద్యార్థులు పాల్గొన్నారు.

Share this…
0 replies

Leave a Reply

Want to join the discussion?
Feel free to contribute!

Leave a Reply

Your email address will not be published. Required fields are marked *